फेरि जन्मनेछन् लक्ष्मीप्रसाद

इतिहासले मागेको छ समाजले पुकारेको छ
तसर्थ फेरि जन्मनेछन् लक्ष्मीप्रसाद
घात प्रतिघातले आघात समाजमा
साम्प्रदायिक कलहको खटिरामा
मल्हम लगाउन यात्री बनि फर्कनेछन्
कथित स्वतन्त्रता योद्दाहरुलाई
आमाको अस्मिता लुट्नबाट रोक्नलाई
चेतना पुरुष बनि फर्कनेछन् लक्ष्मीप्रसाद
घृणालाई सद्भावमा बदल्नलाई
मदन बनेर आउनेछन् लक्ष्मीप्रसाद
भविष्यको सुन्दर सपना साँचेर
पराई माटोमा मरेका धर्तीपुत्रको गाथा लेख्न
हिजोका भिखारीलाई सडकबाट उठाई
समानता र न्याय बितरण गर्न
गरिबको युगनायक बनेर आउनेछन् लक्ष्मीप्रसाद
अनि कथित अभिजात्यको अहँकार तोड्न
फेरि जन्मनेछन् लक्ष्मीप्रसाद
अभाव र गरिबीको सामना गर्दै
समाज परिवर्तनको कथा बोकेर
फेरि जन्मनेछन् लक्ष्मीप्रसाद
इतिहासको गर्भबाट जन्मनेछन्
युगको लक्ष्मीप्रसाद बनि
समानता र न्यायको महाकवि बनि

नविन गौतम (दक्षिण कोरिया)
२०६५।७।१२, साँझ ४:३० बजे
सन्दर्भ: लक्ष्मीजयन्ती